रुपन्देहीको कन्चन–१ दानापुर तालमा ‘दानापुर सैनामैना रोटरी पार्क’ उद्घाटन

रुपन्देहीको कन्चन–१ दानापुर तालमा ‘दानापुर सैनामैना रोटरी पार्क’ उद्घाटन
रुपन्देही जिल्लाको कन्चन गाउँपालिका–१ स्थित ऐतिहासिक तथा पर्यटकीय महत्व बोकेको दानापुर तालको प्रवर्द्धन तथा संरक्षणलाई लक्ष्य गर्दै रोटरी क्लब अफ सैनामैनाको पहलमा निर्माण गरिएको ‘दानापुर सैनामैना रोटरी पार्क’ आज एक विशेष समारोहका बीच उद्घाटन गरिएको छ। कन्चन गाउँपालिकाका अध्यक्ष नवराज ढकालले विधिवत रूपमा पार्कको उद्घाटन गर्दै स्थानीय पर्यटन प्रवर्द्धनमा यस्ता संरचनाको महत्वपूर्ण भूमिका रहने बताउनुभयो।
कार्यक्रमको अध्यक्षता रोटरी क्लब अफ सैनामैनाका अध्यक्ष भोजराज पौडेलले गर्नुभएको थियो भने कार्यक्रम सञ्चालन शिक्षक विष्णु अर्यालले गर्नुभएको थियो। उद्घाटन कार्यक्रममा कन्चन गाउँपालिकाका वडा सदस्यहरू, गाउँपालिका कर्मचारीहरू, विभिन्न संघ–संस्थाका प्रतिनिधिहरू, सामुदायिक वनका अध्यक्ष प्रेम थापा लगायत स्थानीय बासिन्दाहरूको उल्लेखनीय उपस्थिति रहेको थियो।
उद्घाटन समारोहलाई सम्बोधन गर्दै गाउँपालिका अध्यक्ष नवराज ढकालले दानापुर ताल प्राकृतिक रूपमा अत्यन्तै सुन्दर र सम्भावनायुक्त क्षेत्र भएको उल्लेख गर्नुभयो। उहाँले भन्नुभयो, “दानापुर ताल कन्चन गाउँपालिकाको गहना हो। यस तालको संरक्षण र प्रचारप्रसारका लागि रोटरी क्लब अफ सैनामैनाले निर्माण गरेको यो पार्क प्रशंसनीय कार्य हो। यस्ता साझेदारीले स्थानीय पर्यटनलाई टेवा पुग्नुका साथै समुदायमा सकारात्मक सन्देश प्रवाह गर्छ।”
अध्यक्ष ढकालले स्थानीय सरकार दानापुर तालको दीर्घकालीन संरक्षण, सरसफाइ र पूर्वाधार विकासका लागि प्रतिबद्ध रहेको समेत स्पष्ट पार्नुभयो। उहाँका अनुसार तालको संरक्षणसँगै यहाँ आउने आन्तरिक तथा बाह्य पर्यटकको संख्यामा वृद्धि भई स्थानीय अर्थतन्त्र सुदृढ हुनेछ।
कार्यक्रमको अध्यक्षता गर्दै रोटरी क्लब अफ सैनामैनाका अध्यक्ष भोजराज पौडेलले क्लबको सामाजिक उत्तरदायित्व अन्तर्गत दानापुर तालको पहिचान बढाउने उद्देश्यले पार्क निर्माण गरिएको जानकारी दिनुभयो। उहाँले भन्नुभयो, “रोटरी क्लब केवल सेवा गर्ने संस्था मात्र होइन, समाजसँग सहकार्य गर्दै दीर्घकालीन प्रभाव पार्ने काम गर्न चाहन्छ। दानापुर तालको सौन्दर्य र महत्वलाई अझ उजागर गर्न यो पार्क निर्माण गरिएको हो।”
अध्यक्ष पौडेलका अनुसार पार्क निर्माणले ताल वरपर आउने पर्यटकलाई बस्न, विश्राम गर्न तथा फोटो खिच्न सहज बनाउनेछ। साथै, यसले स्थानीय युवालाई पर्यटनसम्बन्धी गतिविधिमा आकर्षित गर्दै रोजगारीका अवसर सिर्जना गर्न पनि सहयोग पुग्ने विश्वास व्यक्त गर्नुभयो।
कार्यक्रमका सञ्चालक शिक्षक विष्णु अर्यालले दानापुर तालको ऐतिहासिक, पर्यावरणीय र शैक्षिक महत्वबारे प्रकाश पार्दै यस्ता संरचनाले विद्यार्थी र युवालाई प्रकृतिसँग जोड्न मद्दत गर्ने बताउनुभयो। उहाँले ताल क्षेत्रलाई खुला सिकाइ केन्द्रका रूपमा विकास गर्न सकिने सम्भावनासमेत औंल्याउनुभयो।
कार्यक्रममा सहभागी विभिन्न संघ–संस्थाका प्रतिनिधिहरूले रोटरी क्लब अफ सैनामैनाको पहलको खुलेर प्रशंसा गरेका थिए। सामुदायिक वनका अध्यक्ष प्रेम थापाले दानापुर ताल र वरपरको वन क्षेत्र संरक्षणमा सबै सरोकारवालाको सहकार्य आवश्यक रहेको बताउँदै पार्कले संरक्षण चेतनामा थप ऊर्जा दिने विश्वास व्यक्त गर्नुभयो।
स्थानीय बासिन्दाहरूका अनुसार दानापुर ताल धार्मिक, सांस्कृतिक र प्राकृतिक दृष्टिले महत्वपूर्ण स्थल हो। तर पर्याप्त प्रचारप्रसारको अभावमा यसको सम्भावना पूर्ण रूपमा उजागर हुन सकेको थिएन। रोटरी पार्क निर्माणसँगै ताल क्षेत्र थप व्यवस्थित र आकर्षक बनेको स्थानीयहरूको भनाइ छ।
रोटरी क्लब अफ सैनामैनाले निर्माण गरेको दानापुर सैनामैना रोटरी पार्कले ताल क्षेत्रको सौन्दर्य वृद्धि गर्नुका साथै आगन्तुकलाई सकारात्मक अनुभूति दिने अपेक्षा गरिएको छ। पार्कमा हरियाली, बस्ने व्यवस्था तथा दृश्यावलोकनका लागि उपयुक्त स्थानहरू तयार गरिएका छन्, जसले तालको प्राकृतिक सुन्दरतालाई अझ नजिकबाट अनुभव गर्न सहयोग पुर्‍याउनेछ।
स्थानीय सरकार, सामाजिक संस्था र समुदायको संयुक्त प्रयासबाट निर्माण भएको यो पार्क दानापुर तालको प्रचारप्रसारमा कोशेढुंगा सावित हुने विश्वास गरिएको छ। आगामी दिनमा ताल क्षेत्रलाई थप व्यवस्थित गर्दै पर्यटकीय गन्तव्यका रूपमा विकास गर्न यस्ता पहलहरू निरन्तर आवश्यक रहेको सरोकारवालाहरूले बताएका छन्।
दानापुर सैनामैना रोटरी पार्कको उद्घाटनसँगै दानापुर तालले नयाँ पहिचान पाउने र कन्चन गाउँपालिकाको पर्यटन विकासमा नयाँ आयाम थपिने अपेक्षा गरिएको छ।