प्रतिनिधि सभा सदस्य निर्वाचन नजिकिँदै जाँदा देशभर चुनावी माहोल तातेको छ। रुपन्देहीका विभिन्न निर्वाचन क्षेत्रमा उम्मेदवारहरू घरदैलो, कोणसभा र भेटघाटमा व्यस्त देखिन्छन्। कतिपय ठूला दलका उम्मेदवारहरू सुख–सयल छोडेर आम नागरिकसँगै बसेर खाना खाने, खेतबारीमा सघाउने, मठमन्दिर तथा संघ–संस्थामा पुगेर मत माग्ने जस्ता परम्परागत प्रचार शैली अपनाइरहेका छन्। तर यही चुनावी भीडमा फरक पहिचान बनाउँदै अघि बढिरहेका छन् उज्यालो नेपाल पार्टीका युवा उम्मेदवार इन्जिनियर सुरज पाण्डे।
रैथाने उम्मेदवार सुरज पाण्डे भड्किलो जुलुस, ठूला ब्यानर र अनावश्यक खर्चभन्दा टाढा रहँदै सरल, सादगीपूर्ण र प्रविधिमैत्री प्रचारमा केन्द्रित देखिन्छन्। उनी चुनावलाई केवल मत माग्ने प्रक्रिया नभई विचार, योजना र दृष्टिकोण प्रस्तुत गर्ने अवसरका रूपमा लिइरहेका छन्। यही सोचका कारण उनले सामाजिक सञ्जाललाई प्रभावकारी माध्यम बनाएका छन्।
डिजिटल एजेण्डासहित मतदातामाझ
सुरज पाण्डेले आफ्ना आठ मुख्य एजेण्डालाई समेटेर भिडियो सामग्री तयार गरी सामाजिक सञ्जालमार्फत सार्वजनिक गरेका छन्। ती भिडियोहरूमा उनले क्षेत्रीय विकास, शिक्षा, स्वास्थ्य, रोजगारी, पूर्वाधार, कृषि आधुनिकीकरण, पारदर्शिता र सुशासनलाई प्राथमिकतामा राखेका छन्। छोटो, स्पष्ट र तथ्यमा आधारित प्रस्तुतीकरणका कारण उनको प्रचार शैली धेरैका लागि नौलो र आकर्षक बनेको छ।
बुधबार भाटभटेनी नजिक आयोजित कोणसभामा उनले डिजिटल भिडियो डिस्प्लेमार्फत पार्टीको घोषणापत्र र आफ्नो निर्वाचन क्षेत्रको विकास योजना प्रस्तुत गरे। माइक र भाषण मात्र नभई दृश्य सामग्रीमार्फत योजना देखाउने शैलीले उपस्थित मतदातालाई फरक अनुभूति गरायो। कतिपय मतदाताले “पहिलो पटक यति व्यवस्थित ढंगले योजना प्रस्तुत गरेको देखियो” भन्दै सकारात्मक प्रतिक्रिया दिएका थिए।
घरदैलोमा सरल र सक्रिय प्रविधिमैत्री प्रचारसँगै सुरज पाण्डेको घरदैलो अभियान पनि तीव्र गतिमा अघि बढिरहेको छ। उनी बुटवल उपमहानगरपालिका, सैनामैना नगरपालिका र तिलोत्तमा नगरपालिकाका विभिन्न टोल–बस्तीमा पुगेर मतदातासँग प्रत्यक्ष संवाद गरिरहेका छन्। घरदैलोका क्रममा उनी स्थानीय समस्या सुन्ने, सुझाव लिने र समाधानका उपायबारे स्पष्ट धारणा राख्ने प्रयासमा देखिन्छन्।
घरदैलोमा भेटिएका वृद्धदेखि युवा मतदातासम्मले उनको सरल व्यवहार र नम्र प्रस्तुतीकरणको प्रशंसा गरेका छन्। भड्किलो सुरक्षाकर्मी, ठूलो तामझाम वा भीडभन्दा टाढा रहँदै उनी केही युवा स्वयंसेवकसहित शान्त वातावरणमा घरघर पुगिरहेका छन्। यसले मतदातासँग आत्मीय सम्बन्ध बनाउन सहज भएको स्थानीयहरूको भनाइ छ।
लोडसेडिङ मुक्त नेपालको सन्दर्भ र विकासको प्रतिबद्धता
घरदैलोका क्रममा सुरज पाण्डेले ऊर्जा क्षेत्रको सुधार र विकासको विषयलाई विशेष रूपमा उठाएका छन्। नेपाल लोडसेडिङ मुक्त भएको समयलाई स्मरण गर्दै उनले ऊर्जा क्षेत्रमा भएको सकारात्मक परिवर्तनले उद्योग, व्यवसाय र दैनिक जीवनमा पारेको प्रभावबारे चर्चा गरेका छन्। विशेषगरी कुलमान घिसिङ को कार्यकालमा देशले लोडसेडिङबाट मुक्ति पाएको प्रसंग उल्लेख गर्दै उनले सुशासन, इमानदारी र परिणाममुखी नेतृत्वको उदाहरण प्रस्तुत गरेका छन्।
उनको भनाइ छ, “जब सही नेतृत्व र स्पष्ट योजना हुन्छ, असम्भव जस्तो लाग्ने काम पनि सम्भव हुन्छ।” यही सन्दर्भ जोड्दै उनले आफू पनि इमानदार, मेहनती र पारदर्शी नेतृत्वमार्फत रुपन्देहीको समग्र विकासमा योगदान दिने प्रतिबद्धता व्यक्त गरेका छन्।
युवा पुस्ताको भरोसा रुपन्देहीमा ठूलो संख्यामा रहेका युवा मतदाता अहिले परिवर्तन र नयाँ सोचको खोजीमा छन्। परम्परागत राजनीतिक शैलीभन्दा फरक, प्रविधिमा दक्ष र स्पष्ट एजेण्डा भएका उम्मेदवारप्रति युवाहरू आकर्षित देखिन्छन्। सुरज पाण्डे आफैं इन्जिनियरिङ पृष्ठभूमिबाट आएका युवा भएकाले विकासका प्राविधिक पक्षबारे स्पष्ट धारणा राख्न सक्छन् भन्ने विश्वास धेरै युवामा देखिएको छ।
सामाजिक सञ्जालमा उनको सक्रियता, प्रत्यक्ष लाइभ संवाद, प्रश्नोत्तर कार्यक्रम र छोटा भिडियो सन्देशले युवाहरूलाई जोड्ने काम गरेको छ। “नेता भनेको पहुँचभन्दा पनि परिणाम दिन सक्ने व्यक्ति हुनुपर्छ” भन्ने उनको धारणा धेरैलाई मन परेको छ।
चुनावी प्रचारमा अत्यधिक खर्च र तडक–भडकप्रति असन्तुष्टि व्यक्त गर्ने मतदाता पनि कम छैनन्। सुरज पाण्डेले सकेसम्म कम खर्चमा, सन्देशमुखी र वातावरणमैत्री प्रचार गर्ने प्रयास गरेका छन्। ठूला होर्डिङ बोर्डभन्दा डिजिटल सामग्री, कागजको अत्यधिक प्रयोगभन्दा सामाजिक सञ्जाल र प्रत्यक्ष संवादलाई प्राथमिकता दिनु उनको अभियानको विशेषता बनेको छ।
उनले मतदातालाई “मत किन दिने?” भन्ने प्रश्नको स्पष्ट जवाफ दिन खोजेका छन्। आठ एजेण्डामा आधारित विकास दृष्टिकोण, पारदर्शी बजेट प्रयोग, स्थानीय युवालाई रोजगारी, प्रविधिमैत्री सेवा प्रवाह र भ्रष्टाचारविरुद्ध कडा अडान उनका प्रमुख प्रतिबद्धता हुन्।
क्षेत्रगत भ्रमण र संवादपछिल्लो एक हप्तादेखि उनी आफ्नो निर्वाचन क्षेत्रका मुख्य चोक–चौराहा, बजार क्षेत्र र बस्तीमा पुगेर डिजिटल डिस्प्ले मार्फत योजना प्रस्तुत गर्दै आएका छन्। बुटवल, सैनामैना र तिलोत्तमाका विभिन्न स्थानमा आयोजित साना कोणसभामा उनले मतदातासँग खुला संवाद गरेका छन्।
उनी केवल भाषणमा सीमित नभई, मतदाताबाट आएका प्रश्नको जवाफ दिन, सुझाव टिपोट गर्न र सम्भावित कार्ययोजना बनाउने प्रतिबद्धता व्यक्त गर्न सक्रिय देखिन्छन्। यसले मतदातामा “हाम्रो कुरा सुन्ने उम्मेदवार” भन्ने सकारात्मक सन्देश पुगेको छ।
इमानदार र मेहनती छवि स्थानीयस्तरमा सुरज पाण्डेलाई इमानदार, मेहनती र सरल स्वभावका रूपमा चिन्नेहरू धेरै छन्। चुनावी माहोलमा आरोप–प्रत्यारोप चलिरहँदा पनि उनी सकारात्मक एजेण्डा केन्द्रित प्रचारमै व्यस्त छन्। उनी भन्छन्, “नकारात्मक प्रचारले होइन, सकारात्मक योजना र कामले मत जितिन्छ।”
यही सन्देशका कारण उनी क्रमशः युवाको रोजाइ बन्दै गइरहेका छन्। विशेषगरी पहिलो पटक मतदान गर्न लागेका युवामाझ उनको लोकप्रियता बढ्दो छ।
