रूपन्देही–२ मा चुन्न प्रसाद शर्माको घरदैलो अभियान तीव्र, कालिकापथदेखि देवीनगरसम्म जनतासँग प्रत्यक्ष संवाद

रूपन्देही–२ मा चुन्न प्रसाद शर्माको घरदैलो अभियान तीव्र, कालिकापथदेखि देवीनगरसम्म जनतासँग प्रत्यक्ष संवाद
रूपन्देही निर्वाचन क्षेत्र नं. २ मा चुन्न प्रसाद शर्मा ले घरदैलो अभियानको छैटौँ दिन पनि मतदातासँग प्रत्यक्ष संवादलाई निरन्तरता दिएका छन्। प्रतिनिधि सभा सदस्यका लागि उम्मेदवारी दिएका शर्माले “जनताको घरदैलोमै पुगेर समस्या सुन्नु र समाधानको स्पष्ट प्रतिबद्धता गर्नु नै मेरो प्राथमिकता हो” भन्दै अभियानलाई थप सक्रिय बनाएका छन्।
छैटौँ दिनको अभियान बिहान बुटवल उपमहानगरपालिका–९ अन्तर्गत नेपालगन्ज रोडको कालिका मन्दिरबाट सुरु भएको थियो। धार्मिक तथा व्यापारिक दृष्टिले महत्त्वपूर्ण मानिने यस क्षेत्रबाट अभियान प्रारम्भ गर्दै शर्माले स्थानीयवासीसँग प्रत्यक्ष भेटघाट गरेका थिए। कालिकापथका विभिन्न टोल, मिलनचोक, तिनकुने चोक हुँदै कालिकापथ शिवालयसम्म पुगेर उनले घरदैलो गर्दै मतदाताका गुनासा, सुझाव र अपेक्षाहरू सुने।
स्थानीयवासीले विशेषगरी कालिकापथ क्षेत्रमा बढ्दो व्यापारिक गतिविधिसँगै देखिएको अव्यवस्थाप्रति ध्यानाकर्षण गराएका थिए। रात्रीकालीन बजारलाई व्यवस्थित गर्नुपर्ने, पर्याप्त सडक बत्ती जडान गर्नुपर्ने, खानेपानीको दीर्घकालीन समाधान खोजिनुपर्ने तथा सुरक्षित र सहज व्यापारिक वातावरण सुनिश्चित गर्नुपर्ने माग स्थानीयले अघि सारे। व्यवसायीहरूले बजार व्यवस्थापनलाई वैज्ञानिक र दिगो बनाउन, फुटपाथ व्यवस्थापन, सवारी पार्किङको उचित प्रबन्ध तथा सुरक्षाकर्मीको प्रभावकारी परिचालन गर्न आग्रह गरेका थिए।
उम्मेदवार शर्माले कालिकापथलाई व्यवस्थित र आकर्षक व्यापारिक केन्द्रका रूपमा विकास गर्ने प्रतिबद्धता दोहो¥याउँदै आवश्यक पूर्वाधार सुधारमा पहल गर्ने बताए। “कालिकापथ बुटवलकै एक महत्वपूर्ण व्यापारिक नाका हो। यहाँको बजारलाई योजनाबद्ध रूपमा विस्तार र व्यवस्थापन गर्न सकेमा स्थानीय अर्थतन्त्र थप सशक्त बन्न सक्छ,” उनले भने। उनले संघ, प्रदेश र स्थानीय तहबीच समन्वय गरेर सडक स्तरोन्नति, ढल निकास सुधार, खानेपानी विस्तार तथा स्मार्ट लाइटिङ जस्ता कार्यक्रम अघि बढाउने स्पष्ट संकेत गरे।
“छैटौँ दिनसम्म आइपुग्दा जनताको उत्साह र विश्वासले मेरो जिम्मेवारी अझ बढाएको छ,” शर्माले भने, “जनताको अपेक्षालाई सम्बोधन गर्नेगरी दीर्घकालीन विकास योजनासहित अघि बढ्नेछु।” उनले चुनावी अभियान केवल मत माग्ने प्रक्रिया नभई जनतासँगको सम्बन्ध सुदृढ गर्ने अवसर भएको पनि उल्लेख गरे।
अभियानमा रिता सेन ओली को पनि सक्रिय सहभागिता रहेको थियो। नेपाली काङ्ग्रेसकी समानुपातिक उम्मेदवार ओलीले जनताको घरदैलोमा पुगेर सुझाव लिनु नै लोकतन्त्रको सुन्दर अभ्यास भएको बताइन्। “समानुपातिक प्रणालीमार्फत समावेशी आवाज संसदमा पु¥याउने हाम्रो दायित्व हो। हरेक समुदाय, वर्ग र क्षेत्रका मुद्दालाई नीति निर्माण तहसम्म लैजान हामी प्रतिबद्ध छौँ,” उनले भनिन्। उनले महिला, युवा, दलित, जनजाति तथा सीमान्तकृत समुदायको प्रतिनिधित्व सुनिश्चित गर्नुपर्ने आवश्यकता औंल्याइन्।
दिउँसो १ बजेपछि अभियान बुटवल उपमहानगरपालिका–११ तर्फ मोडिएको थियो। कालिकानगर सर्भिस लेनबाट सुरु भएको घरदैलो होराइजन चोक, योगीकुटी, माझगाउँ, देवीनगर हुँदै तल्लो देवीनगरसम्म पुगेको थियो। वडा नं. ११ का बासिन्दाले सडक स्तरोन्नति, ढल निकासको उचित व्यवस्था, स्वच्छ खानेपानी आपूर्ति र सहरी पूर्वाधार सुधारको माग राखेका थिए।
स्थानीयले वर्षायाममा डुबानको समस्या दोहोरिने गरेको, कतिपय स्थानमा कच्ची सडकका कारण धुलो र हिलोको समस्या झेल्नुपरेको तथा अव्यवस्थित तार जडान र अपर्याप्त सडक बत्तीले असुरक्षा बढाएको गुनासो गरेका थिए। व्यवसायी तथा सर्वसाधारणले व्यवस्थित सहरी योजना आवश्यक रहेको औंल्याउँदै दीर्घकालीन सोचसहित काम गर्न आग्रह गरे।
शर्माले स्थानीय तहसँग समन्वय गरी चरणबद्ध रूपमा समस्या समाधान गर्ने प्रतिबद्धता व्यक्त गरे। उनले संघीय सांसदको भूमिकालाई नीति निर्माण, बजेट विनियोजन र समन्वयकारी नेतृत्वसँग जोड्दै “स्थानीय तहका योजनालाई केन्द्रसँग जोडेर बजेट सुनिश्चित गराउने मेरो प्राथमिकता हुनेछ” भने। उनले रोजगारी सिर्जना, साना तथा मझौला व्यवसाय प्रवर्द्धन, सीपमूलक तालिम र पर्यटन सम्भावनाको उपयोगमार्फत क्षेत्रीय आर्थिक विकासलाई गति दिने योजना पनि सुनाए।
कार्यक्रममा स्थानीय नेता, कार्यकर्ता तथा शुभेच्छुकहरूको उल्लेखनीय सहभागिता रहेको थियो। घरदैलोका क्रममा युवाहरूको उत्साहजनक उपस्थितिले अभियानलाई थप ऊर्जावान बनाएको बताइएको छ। कतिपय स्थानमा स्थानीयले स्वागत तथा सम्मान कार्यक्रमसमेत आयोजना गरेका थिए।
रूपन्देही–२ मा चुनावी सरगर्मी बढ्दै जाँदा उम्मेदवारहरूबीच प्रत्यक्ष संवाद र विकास एजेन्डामा केन्द्रित प्रतिस्पर्धा देखिएको छ। शर्माको छैटौँ दिनको अभियानले विशेषगरी शहरी पूर्वाधार, बजार व्यवस्थापन र आधारभूत सेवाको सुधारलाई प्राथमिकतामा राखेको स्पष्ट संकेत दिएको छ। आगामी दिनहरूमा पनि घरदैलो अभियानलाई निरन्तरता दिँदै क्षेत्रका बाँकी वडामा पुग्ने कार्यक्रम रहेको उनका सहयोगीहरूले जानकारी दिएका छन्।
यसरी छैटौँ दिनको घरदैलो अभियानले मतदातासँगको सम्बन्ध थप मजबुत बनाउँदै विकासका मुद्दालाई केन्द्रमा राख्ने प्रयास गरेको देखिएको छ। चुनाव नजिकिँदै जाँदा यस्ता प्रत्यक्ष संवादले मतदाताको अपेक्षा र उम्मेदवारको प्रतिबद्धताबीचको दूरी घटाउने अपेक्षा गरिएको छ।