✍️ महेश घिमिरे (केदार)
नेपालको राजनीतिक इतिहासमा कहिलेकाहीँ यस्ता क्षणहरू आउँछन्, जब राज्यको भविष्य नै अनिश्चित देखिन्छ। जेन्जी आन्दोलनपछि उत्पन्न भएको परिस्थिति त्यस्तै एउटा क्षण थियो। पुराना राजनीतिक संरचनाप्रति गहिरो असन्तुष्टि, दलहरूबीचको अविश्वास, र राज्य संयन्त्रप्रति जनतामा बढ्दो निराशाले देशलाई गम्भीर संक्रमणको मोडमा पुर्याएको थियो।
यही जटिल र संवेदनशील घडीमा नेपालले पहिलोपटक ७३ वर्षीया महिला सुशीला कार्कीको नेतृत्वमा अन्तरिम सरकार पायो। न्यायिक क्षेत्रबाट आफ्नो दृढता, स्पष्टता र निष्पक्षताका कारण परिचित कार्कीलाई राजनीतिक दलहरूले अन्ततः एक तटस्थ र भरोसायोग्य व्यक्तित्व का रूपमा स्वीकार गर्न बाध्य भए।
अन्तरिम सरकारको गठन आफैँमा सजिलो प्रक्रिया थिएन। आन्दोलनले सिर्जना गरेको दबाब, सडकको मनोविज्ञान, र दलहरूको आन्तरिक प्रतिस्पर्धाले राजनीतिक वातावरण अत्यन्तै संवेदनशील बनेको थियो। यस्तो अवस्थामा सरकारको मुख्य जिम्मेवारी एउटै थियो— हो देशलाई अस्थिरताको दलदलबाट निकाल्दै निर्वाचनमार्फत नयाँ जनादेश लिनु।
चुनौतीहरु धेरै थिए सडक देखि सदन सम्सका होस् या सरकार सञ्चालनको क्रममा देखिएका चुनौती हुन् । अन्तरिम मन्त्रिपरिषमा रहेका केही मन्त्रीहरू नै चुनावी प्रतिस्पर्धामा उत्रन राजीनामा दिएर मैदानमा होमिए। यसले सरकारलाई राजनीतिक रूपमा झनै कमजोर बनाउने सम्भावना थियो। तर सुशीला कार्कीले परिस्थितिलाई धैर्य र संयमका साथ व्यवस्थापन गरिन्।
उनले सुरक्षा निकाय, निर्वाचन आयोग, प्रशासनिक संयन्त्र र राजनीतिक दलहरूबीच समन्वय कायम गर्दै राज्यको संस्थागत क्षमता पुनः सक्रिय पार्ने प्रयास गरिन्।
यसको परिणामस्वरूप फागुन २१ गते तोकिएकै मितिमा देशभर निर्वाचन सम्पन्न भयो, र त्यो पनि अपेक्षाभन्दा धेरै शान्तिपूर्ण वातावरणमा। नेपालको हालसम्मको अस्थिर राजनीतिक इतिहासलाई हेर्दा यस्तो परिस्थिति आफैँमा उल्लेखनीय उपलब्धि हो।
आज देशभरबाट निर्वाचन परिणामहरू क्रमशः सार्वजनिक भइरहेका छन्। परिणाम जे आए पनि एउटा तथ्य स्पष्ट भइसकेको छ— नेपालको लोकतन्त्र अझै जीवित छ। आन्दोलनले व्यवस्था हल्लाउन सक्छ, तर अन्ततः समाधान संस्थागत प्रक्रियाबाटै खोजिन्छ।
सुशीला कार्की नेतृत्वको अन्तरिम सरकारले यही सन्देश दिएको छ।
राजनीति केवल शक्ति प्राप्त गर्ने माध्यम मात्र होइन, राष्ट्रलाई संकटबाट सही दिशातर्फ अघि बढाउने जिम्मेवारी पनि हो।
यस कठिन र संवेदनशील घडीमा राष्ट्रलाई लोकतान्त्रिक प्रक्रियातर्फ सुरक्षित रूपमा अघि बढाउन नेतृत्वदायी भूमिका निर्वाह गर्नु सुशीला कार्कीको ऐतिहासिक योगदानका रूपमा स्मरण गरिनेछ।
अन्त्यमा, यस्तो जटिल राजनीतिक संकटको समयमा धैर्य, जिम्मेवारी र प्रतिबद्धताका साथ निर्वाचन सफलतापूर्वक सम्पन्न गराएकोमा सुशीला कार्कीलाई हार्दिक धन्यवाद तथा आगामी दिनका लागि हार्दिक शुभकामना व्यक्त गर्दछु।
