न्यु मुनलाइट युवा क्लबमा नयाँ नेतृत्व चयन, विकासमुखी योजनामा जोड
रुपन्देहीको कञ्चन गाउँपालिका वडा नं. १ मा रहेको न्यु मुनलाइट युवा क्लबले नयाँ नेतृत्व चयन गरेको छ। अमर गुरुङको अध्यक्षतामा १३ सदस्यीय कार्यसमिति सर्वसम्मत रूपमा चयन गरिएको हो। नवगठित कार्यसमितिमा उपाध्यक्षमा दिनेश घिमिरे र ममता कार्की, सचिवमा राहुल परियार, कोषाध्यक्षमा सागर जी.सी. तथा सह–सचिवमा धना थापा चयन भएका छन्। त्यसैगरी सदस्यहरूमा बादल कार्की, प्रकाश कार्की, किरण विक, विवेक भारती,राजु सुनार प्रदीप क्षेत्री, बिपना क्षेत्री र स्वस्तिका पौडेल रहेका छन्।
नवनिर्वाचित अध्यक्ष अमर गुरुङले कार्यसमितिसँगको प्रारम्भिक छलफलमा कञ्चन–१ लौसा क्षेत्रको समग्र विकासमा क्लबले सक्रिय भूमिका खेल्ने प्रतिबद्धता व्यक्त गर्नुभयो। उहाँले युवाहरूको सहभागिता बढाउँदै सामाजिक, शैक्षिक, खेलकुद तथा सांस्कृतिक गतिविधिलाई प्राथमिकतामा राखेर अगाडि बढ्ने योजना रहेको बताउनुभयो। विशेषगरी स्थानीय पूर्वाधार विकास, युवा सशक्तीकरण र सामाजिक एकतामा केन्द्रित कार्यक्रम सञ्चालन गरिने उहाँको भनाइ थियो।
कार्यक्रममा उपस्थित स्थानीयवासी तथा सरोकारवालाहरूले निवर्तमान अध्यक्ष प्रकाश कार्कीको नेतृत्वमा सम्पन्न कार्यहरूको खुलेर प्रशंसा गरेका थिए। उहाँको कार्यकालमा क्लबले ग्राउन्ड निर्माण, “उज्यालो लौसा” अभियान तथा तीज सांस्कृतिक महोत्सव जस्ता उल्लेखनीय कार्यक्रमहरू सफलतापूर्वक सञ्चालन गरेको थियो। यस्ता गतिविधिहरूले गाउँको पहिचान स्थापित गर्नुका साथै समुदायमा एकता र उत्साह बढाएको सहभागीहरूले बताए।
निवर्तमान अध्यक्ष प्रकाश कार्कीले आफ्नो कार्यकालमा सहयोग गर्ने सम्पूर्ण कार्यसमिति, समाजसेवी तथा स्थानीयवासीप्रति धन्यवाद व्यक्त गर्नुभयो। उहाँले क्लबलाई यहाँसम्म पुर्याउन सबैको योगदान महत्वपूर्ण रहेको उल्लेख गर्दै आगामी दिनमा पनि नयाँ नेतृत्वलाई साथ र सहयोग रहने विश्वास व्यक्त गर्नुभयो। उहाँका अनुसार, कञ्चन क्षेत्रमा न्यु मुनलाइट युवा क्लबले उदाहरणीय सामाजिक कार्य गर्दै आएको छ र यसलाई निरन्तरता दिन नयाँ टोली सक्षम रहनेछ।
क्लबले विगतमा खेलकुद प्रतियोगिता, सरसफाइ अभियान, सांस्कृतिक कार्यक्रम, तथा सामाजिक सचेतनामूलक गतिविधिहरू सञ्चालन गर्दै आएको छ। यस्ता कार्यक्रमहरूले युवाहरूलाई सकारात्मक दिशातर्फ उन्मुख गराउँदै समाजमा राम्रो सन्देश प्रवाह गरेको देखिन्छ। विशेषगरी “उज्यालो लौसा” अभियानले गाउँलाई व्यवस्थित र सुन्दर बनाउन उल्लेखनीय योगदान पुर्याएको थियो।
नयाँ कार्यसमितिले पुराना अनुभवलाई आत्मसात गर्दै थप नवीन योजना र कार्यक्रमहरू ल्याउने अपेक्षा गरिएको छ। स्थानीय स्तरमा शिक्षा, स्वास्थ्य, वातावरण संरक्षण तथा रोजगार सिर्जनामा ध्यान दिँदै क्लबले दीर्घकालीन प्रभाव पार्ने गतिविधि सञ्चालन गर्ने योजना बनाएको छ। यसका साथै युवाहरूलाई नेतृत्व विकास, क्षमता अभिवृद्धि तथा सामाजिक उत्तरदायित्वतर्फ प्रेरित गर्ने लक्ष्य पनि लिएको छ।
समग्रमा, न्यु मुनलाइट युवा क्लब कञ्चन–१ को एक सक्रिय र उदाहरणीय संस्था बनेको छ। यसले विगतमा गरेका सकारात्मक कार्यहरूलाई निरन्तरता दिँदै नयाँ नेतृत्वको सक्रियतामा अझ प्रभावकारी रूपमा अघि बढ्ने विश्वास गरिएको छ। स्थानीय विकास, सामाजिक एकता र युवा सशक्तीकरणमा क्लबले खेलेको भूमिका प्रशंसनीय छ र आगामी दिनमा अझ ठूलो योगदान दिने अपेक्षा गरिएको छ।
